Drög að nýrri byggingarreglugerð.
Nýlega kynnti Mannvirkjastofnun drög að nýrri byggingarreglugerð sem stefnt er að taki gildi 1. október nk. Reglugerð þessi er samin vegna laga um mannvirki nr. 160/2010, en þau tóku gildi 1. janúar sl.
Það fyrsta sem lesandinn tekur væntanlega eftir er hversu mikil að vöxtum reglugerð þessi verður, en drögin eru alls 158 síður prentaðar á A4 blöð. Margt er þarna kunnuglegt en einnig margt nýtt svo sem hlutverk hönnunarstjóra, breyttar reglur varðandi byggingarstjóra og krafa um innra eftirlit og síðar gæðastjórnunarkerfi þessara aðila, svo og hönnuða og iðnmeistara, sem leggja ber fyrir Mannvirkjastofnun til samþykktar fyrir hvert verk.
Ákvæði um úttektir breytast og verða ítarlegri og byggingarstjóri skal, samkvæmt reglugerðinni, afhenda eiganda svo og útgefanda byggingarleyfisins handbók mannvirkisins í rafrænu formi, áður en lokaúttekt fer fram.
Allt byggir þetta á fyrrnefndum lögum.
Ekki verður farið nánar í skýringar á þessum drögum hér, en brýnt er að þeir sem koma að framkvæmdum kynni sér þessi drög. Hér má fletta þeim upp: Ný byggingarreglugerð
1. apríl 2011
Er fasteignamarkaðurinn að taka við sér ?
Á árinu 2005 voru seldar um það bil 190 íbúðir á viku að jafnaði á landinu. Þessi fjöldi fór niður í rúmar 40 á árinu 2009 að meðaltali, en er það sem af er þessu ári að meðaltali um 90 og hefur farið yfir 100 síðustu vikur.
Sé reynt að túlka þessar tölur má sjá að salan er nú um helmingur þess sem var á árinu 2005 og var fjöldi viðskipta svipaður árin 2006 og 2007. Hafi þetta verið eðlilegur fjöldi viðskipta, ætti þeim að fjölga um helming frá því sem þau eru nú og má segja að þróunin sé í þá átt, þótt langt sé í land með að ná þeim fjölda.
Rétt er að hafa í huga þegar þetta er skoðað að mikið var byggt á árunum 2005 til 2007, langt umfram meðaltal langs tíma á undan, sem auðvitað var vegna mikillar eftirspurnar sem kom upp í þeirri bólu sem þá var að ganga yfir íslenskt þjóðfélag. Þannig er ekki líklegt að viðskipti með fasteignir verði jafnmörg og þá var, en hins vegar er erfitt að fastsetja einhvern hæfilegan fjölda viðskipta af þessu tagi.
.
1. mars 2011
Fasteignakerfið
1. júlí 2010
Byggingarframkvæmdir í landinu undanfarið og á næstu árum
Á árunum 2005 til 2007 voru byggðar helmingi of margar íbúðir á landinu eins og fram kemur á meðfylgjandi línuriti, þar sem fjöldi nýbyggðra íbúða er borinn saman við íbúafjölda á þessu árabili. Árið 2008 voru enn byggðar fleiri íbúðir en meðaltalsþörfin sagði til um þó að munurinn væri minni. Árið 2009 snerist þetta hins vegar við og voru þá fullgerðar íbúðir einungis um 10% af meðaltalsþörf nýrra íbúða.
Samkvæmt þessu hefur sá lager sem varð til á árunum 2005 til 2008 minnkað sem svarar til eins árs þarfar fyrir nýjar íbúðir og er lagerinn nú líklega til 1-2 ára.
Vegna þessarar stöðu er ekki líklegt að mikið verði byggt af íbúðarhúsnæði á næstu 1 til 2 árum.
Þó að við höfum farið fram úr okkur nú um stundir, verður áfram þörf á nýbyggingum á Íslandi. Framkvæmdir munu því fara af stað að nýju þegar jafnvægi hefur náðst í framboði og eftirspurn, sem verður trúlega að þessum tíma liðnum.
1. júlí 2010
Verðllækkanir við byggingarframkvæmdir umfram aðrar verðlagsbreytingar
Á árunum 2005 til 2007 voru byggðar helmingi of margar íbúðir á landinu sem varð vegna mikillar eftirspurnar sem stafaði af mikilu framboði af ódýru lánsfé og almennri velsæld í landinu. Þetta leiddi af sér miklar hækkanir á verði húsnæðis sem hækkaði langt umfram annað verðlag í landinu, eins og sést á meðfylgjandi línuriti.
Þetta hefur nú snúist við og er raunverð íbúða nú um það bil helmingi lægra en það var þegar það var hæst. Ástæðan fyrir þessari lækkun er sú að mikill lager varð til af íbúðarhúsnæði á þessum árum, auk samdráttar í afkomu landsmanna. Þessi lager hefur nú minnkað aftur, um ca. 1 ár, þar sem eingöngu var byggt um 10% af meðaltalsþörf fyrir íbúðir á árinu 2009. Með sama áframhaldi ætti Íbúðalagerinn því að vera uppurinn að 1 til 2 árum liðnum.
Verð á íbúðarhúsnæði er nú töluvert undir nýbyggingarkostnaði og er ekki grundvöllur fyrir framleiðslu á íbúðarhúsnæði á meðan svo er. Byggingarvísitalan hefur t.d. hækkað um 68% frá ársbyrjun 2005 til dagsins í dag á meðan verð á fasteignum hefur hækkað um 37%. Hafi verðlag verið í jafnvægi þá, er verð nú um 20% undir byggingarkostnaði, Áfram verður þörf á nýbyggingum þótt við höfum farið fram úr okkur nú um stundir. Þegar það verður, mun verðið hækka að nýju og endurspegla a.m.k. byggingarkostnaðinn.
1. júlí 2010
Fjöldi starfa við mannvirkjagerð nú og á næstunni
8. febrúar 2010
VILJUM VIÐ SJÁ 20 ÞÚSUND MANNS ATVINNULAUSA Á ÍSLANDI ?
Þessa spurningu mátti lesa hér á netinu í ársbyrjun 2009, þá voru 10.000 atvinnulausir á landinu. Nú rúmu ári síðar eru atvinnulausir orðnir 17.000 samkvæmt Vinnumálastofnun og fer enn fjölgandi. Svarið í flestra huga við framangreindri spurningu er og hefur auðvitað verið nei, en til aðgerða sem spornað gætu við þróuninni var ekki gripið.
(meira)
01. janúar 2010
Tvö ný stöðluð módel í Byggingarlykli Hannarrs
Í nýrri útgáfu af Byggingarlykli Hannarrs er að finna tvö ný módel fyrir staðlaðar kostnaðaráætlanir. Annað er af stóru verslunarhúsi á einni hæð með mikilli lofthæð, en slík hús eru orðin nokkuð algeng í dag. Hitt módelið er af Leikskóla og er þar tekinn með frágangur lóðar og leiktæki.
Eitt af fyrri módelunum var endurskoðað á sama tíma, það var stórt atvinnuhúsnæði byggt upp með stálgrind. Þar var farið frá hefðbundinni uppbyggingu yfir í einangraðar einingar í veggjum og þaki, sem er orðin algengari aðferð nú og ódýrari.
Þetta hvorutveggja er liður í þróun Byggingarlykilsins til hagsbóta fyrir notendur hans.
01. apríl 2009
Kostnaðarlækkanir við byggingaframkvæmdir
Byggingakostnaður fer nú lækkandi eins og sést t.d. á þeim tilboðum sem menn eru að gera í verk þessa dagana. Ástæðurnar eru þær helstar, að atvinnuleysið verður til þess að menn eru tilbúnir að vinna fyrir lægra kaup en ella, en einnig vegna þess að lóðaverð fer lækkandi og að krónan er að styrkjast. Þeir sem eru að byggja íbúðir fá að auki meiri afslátt á virðisaukaskattinum en áður.
Kostnaður við húsbyggingar er að lækka m.a. af þessum ástæðum, um 8-9% frá því í janúar, samkvæmt okkar tölum í Byggingarlyklinum og þar af er helmingurinn vegna lækkandi lóðarverðs (gatnagerðagjalda). Ekki er inn í þeim tölum lækkun vegna aukinnar endurgreiðslu á VSK, en þá lækkun má meta upp á 1,0 - 1,5% af heildarverði íbúðar.
Byggingavísitalan hefur nánast staðið í stað á sama tíma
.
01. janúar 2009
Byggingaframkvæmdir í landinu undanfarið og á næstu árum
Eins og fram kemur á meðfylgjandi línuriti, þar sem fjöldi nýbyggðra íbúða er borinn saman við íbúafjölda á árabilinu 1970 til 2007, voru byggðar u.þ.b. helmingi of margar íbúðir árin 2005 til 2007. Sé tekið tillit til aðfluttra má ætla að við eigum 2-3 ára birgðir af íbúðum í landinu. Líklega eru birgðir af atvinnuhúsnæði enn meiri. Vegna þessarar stöðu og vegna mikils fjármagnskostanaðar er ekki líklegt að mikið verði byggt af íbúðar- eða atvinnuhúsnæði á næstunni. Áfram verður þörf á byggingum þó að við höfum farið fram úr okkur nú um stundir. Framkvæmdir munu því fara af stað að nýju þ.e. þegar jafnvægi hefur náðst.
Hér er því um að ræða tímabundinn vanda, en hann er stór, því að um 14.000 störf voru í greininni árið 2005 (líklega um 15.300 árið 2007). Eðlilegur fjöldi gæti verið um 10.000 störf.
.
20. desember 2008
Ný þjónustusíða Hannarrs
Nú þegar verkefnalistinn styttist og pöntunum fækkar er líklega ástæða til að minna á sig.
Hannarr hefur nú endurhannað þjónustusíðu Byggingarlykilsins á netinu til að auðvelda þetta. Síðan er nú þannig uppbyggð að á heimasíðu Hannarrs er hnappur sem sem heitir
ÞJÓNUSTUSKRÁ BYGGINGA
sem blasir við þegar farið er inn á síðuna. Með því að klikka á hann hoppar upp yfirlitssíða fyrir allt það sem venjulega kemur fyrir við byggingaframkvæmdir. Inn á þessa síðu skrá þeir sig sem vilja koma fyrirtæki sínu á framfæri, efni eða þjónustu á þessu sviði. Auk þessa geta notendur farið inn á viðkomandi flokk og eru þeir þá komnir inn á samsvarandi skráningu á Já-gulu síðunum.
6. nóvember 2008
Á sama tíma að ári
Ár er nú síðan verðhækkanir á íbúðarhúsnæði stöðvuðust og er verðið í dag svipað og var þá. Á sama tíma hefur vísitala byggingakostnaðar hækkað um 23% og er því raunlækkun á verði íbúðarhúsnæðis um 20% á þessu tímabili.
Hækkanir af völdum veikningar íslensku krónunnar eru enn ekki komnar fram, nema að litlu leyti og er líklegt að enn vanti 40-50% upp á það. Sú breyting mun hækka byggingavísitöluna um u.þ.b. 15% þegar hún er af fullu komin fram. Sé reiknað með óbreyttu gengi krónunnar og hóflegri hækkun á innanlandskostnaði gæti 25% hækkun byggingavísitölunnar orðið niðurstaðan fyrir næstu 12 mánuði.
Engar vísbendingar eru um að fasteignaverð muni hækka á þessu tímabili, þvert á móti. Standi það hins vegar í stað ásamt framannefndum forsendum væri aftur um að ræða 20% raunlækkun á íbúðaverði á næsta ári, eða alls 36% á tveimur árum.
Seðlabankinn spáir í Peningamálum í dag raunlækkun upp á 50% á sama tímabili.
Þeir sem ekki eiga sjóði til að fjármagna byggingar næstu mánuði og ár ættu að fara varlega í fjárfestingar í íbúðarhúsnæði. Það mun lækka í verði frá því sem nú er og ekki standa undir byggingakostnaði á næstunni, hvað þá þeim fjármagnskostnaði sem boðið er upp á.
20. október 2008
Miklar hækkanir á byggingarvísitölunni
Mjög miklar hækkanir urðu á byggingavísitölunni, frá október til nóvembervísitölu þessa árs. Hún hækkaði úr 447,7 stigum í október í 463,8 stig í nóvember. Þetta eru 3,6% og myndi sama hækkun í heilt ár verða 52,9%.
Í nóvember á síðasta ári var byggingavísitalan 376,7 stig og hefur þannig hækkað um 23,1% frá þeim tíma.
Hvernig þessi þróun komi til með að verða á næstu mánuðum fer annarsvegar eftir því hvernig gengi íslensku krónunnar verður og hins vegar eftir atvinnuástandinu í byggingariðnaðinum. Ljóst er að hvorutveggja er í mikilli óvissu á þessari stundu.
Við viljum því vara þá við sem standa í framkvæmdum, hvort sem það eru verktakar eða þeir sem standa að framkvæmdunum, að gera samninga á föstum verðum. Bindið verð í slíkum samningum við breytingar á byggingavísitölunnu á einn eða annan hátt.
01. júlí 2008
Verðhækkanir á húsnæði umfram aðrar verðlagsbreytingar að fjara út
Frá ársbyrjun 2004 til maí sl. hefur verð íbúðarhúsnæðis hækkað um tæp 90% á meðan launa- og byggingavísitalan hafa hækkað um nálægt 52%.
Mat Hannarrs frá því í október sl. var að hagur verktaka við húsbyggingar hefði batnað um 20% á þessum tíma og var þá búið að taka tillit til sérstakra hækkana á lóðar- og landverði. Frá október 2007 til maí 2008 hefur verð á húsnæði staðið í stað á meðan byggingavísitalan hefur hækkað um rúm 10% og nú um 13%. Þessi ávinningur verktakanna er þannig að fjara út og verður væntnlega horfinn á haustmánuðum. Þá eru menn í sömu stöðu og í ársbyrjun 2004, nema hvað fjármagnskostnaður hefur hækkað upp úr öllu valdi. Hann er ekki hluti af þessum tölum.
Ekki er ólíklegt að land- og lóðaverð muni lækka aftur þegar frá liður, en það mun ekki gerast á þessu tímabili.
1. júní 2008
UMSJÓN FASTEIGNA
UMSJÓN FASTEIGNA - OPIÐ FYRIR ALLA ÞAR TIL VIÐ ERUM FULLKOMLEGA ÁNÆGÐ MEÐ KERFIÐ (FRAMLENGING)
BL-kerfið þekkja margir sem netkerfi þar sem notendur gera sínar kostnaðaráætlanir og tilboð út frá verðum í Byggingarlykli Hannarrs. Nú er búið að byggja við þetta kerfi öflugan viðbótarmöguleika fyrir fasteignaeigendur og húsfélög til að halda utan um upplýsingar og rekstur eigna sinna. Þetta kerfi sem hefur fengið nafnið Umsjón fasteigna, má nota annaðhvort sem sjálfstætt kerfi eða með tengingu við BL-kerfið.
Farið er inn í kerfið af heimasíðu Hannarrs eða með því að klikka á merkið hér til hægri:
Umsjón fasteigna er heildarkerfi þar sem upplýsingar eru geymdar til að geta flett þeim upp þegar á þarf að halda og er hjálpartæki til að vinna alla venjulega vinnu sem formaður eða eigandi fasteignar þarf að útfæra.
Þar sem við höfum enn ekki náð að klára kerfið þannig að það uppfylli þær kröfur sem við gerum, höfum við ákveðið að hafa það opið til skoðunar og prófunar áfram og munum láta vita þegar við teljum það uppfylla þær þarfir sem það á að gera, fullkomlega, þá fyrst verður farið að rukka fyrir notkun þess. Á meðan er öllum frjálst að nota kerfið, setja inn gögn og vinna með kerfið á þann hátt sem lýsingin segir til um. Við munum reyna að þróa kerfið áfram á þann hátt að þau gögn sem sett eru inn, nýtist áfram þó að þróun kerfisins sé ekki lokið.
Ef þú hefur ábendingar um eitthvað sem vantar eða betur má fara í kerfinu þá láttu okkur endilega vita.
01. október 2007
Verðhækkanir á húsnæði umfram aðrar verðlagsbreytingar
Frá ársbyrjun 2004 til 1. október sl. hefur verð íbúðarhúsnæðis hækkað um tæp 90% á meðan launa- og byggingavísitalan hafa hækkað um nálægt 30%.
Hækkun íbúðarhúsnæðis er þannig rúmlega 45% umfram hækkanir á þessum vísitölum.
Kostnaðaráætlun Hannarrs fyrir fjölbýlishús hefur hækkað um u.þ.b. 70% á þessum sama tíma, sem sýnir þannig verulega meiri hækkun en byggingavísitalan hefur mælt á sama tíma.
Ástæðan fyrir þessu er aðallega sú að gatnagerðagjöld hafa verið að hækka umfram annað en einnig hefurr annað hækkað meira en vísitalan hefur verið að mæla samkvæmt okkar tölum.
Enn er ekki að sjá að draga sé úr þessum muni. Vegna hækkandi vaxta og mikilla byggingaframkvæmda nú og undanfarið, eru hins vegar uppi raddir um að líkur séu á verðlækkun húsnæðis frá því sem nú er. Hannarr tekur undir þetta og bendir húsbyggjendum og framkvæmdaaðilum á að fylgjast vel með markaðnum á næstunni til að geta brugðist við ef ástæða þykir til.
1. júlí 2007
Hækkanir á gatnagerðagjöldum
Undanfarin ár hefur land verið að hækka í verði og hefur þessi hækkun verið að koma inn í lóðaverð eftir mismunandi leiðum og í mismiklum mæli. Þeir sem fylgst hafa með þessum málum hafa bæði séð útboð á lóðum og beina hækkun á gatnagerðagjöldum, mismunandi eftir bæjarfélögum og jafnvel tímum.
Fram að þessu hefur Hannarr miðað gatnagerðagjöld í gögnum sínum við taxta Reykjavíkurborgar, sem hefur verið að dragast meir og meir aftur úr raunverulegu verði eftir því sem tíminn hefur liðið.
Reykjavíkurborg hefur enda sjálf ekki notað þessa taxta eingöngu nema í undantekningartilvikum.
Þann 1 júlí s.l. tók Hannarr upp í viðmiðun sína það verð sem Reykjavíkurborg notaði við síðustu úthlutun, og nær það til alls íbúðarhúsnæðis, bæði í sérbýli og fjölbýli.
Þett hefur umtalsverðar breytingar í för með sér á verði þessara húsa og sem dæmi má nefna að 200 m2 einbýlishús hækkaði, bara vegna þessa liðar um ca. 20%. Fjölbýlishús hækkuðu heldur meira en þetta og minni eignir hækka meira en stærri, vegna þess að hér er um fast gjald að ræða, óháð stærð eignarinnar.
Þetta verð mun verða til endurskoðunar eins og önnur verð í gögnum Hannars
1. apríl 2006
HÆKKANIR UMFRAM VÍSITÖLU
15. febrúar 2006
BYGGINGARLYKILL HANNARRS Á NETINU
Nú hafa orðið þau tímamót að þú getur gert þínar kostnaðaráætlanir og tilboð á netinu.
Verðlisti Byggingarlykils Hannarrs ásamt verklýsingum er nú aðgengilegur á internetinu og opinn fyrir alla næstu þrjár vikurnar. Eftir að hafa skoðað og prófað, getur þú síðan notað hann áfram með því að gerast áskrifandi að Byggingarlyklinum og kaupa þitt aðgangsorð.
15. júlí 2005
Íbúðaverð í Reykjavík
Íbúðaverð í Reykjavík er nú að meðaltali um 195 þús kr./m2. Þessi kostnaður er um 60% hærri en Hannarr reiknar sem meðalkostnað slíkra húsa ef lóðarverð er í samræmi við eldri reglur, þ.e. um 5000 kr/m2. Frá þessum mismun þarf byggingavektakinn að draga umframverð lóðar sem nú er orðinn algengur, áður en hann reiknar sinn hagnað. Einnig er um nokkurn aukakostnað að ræða nú sem stendur vegna þenslu á markaðnum.
Sérbýli er á svipuðu verði á m2 og fjölbýli, en þar er kostnaður meiri á hvern m2 og hagnaður verktakans sem því nemur minni, eða um 30% reiknað á sama hátt.
Fyrir ári voru þessar sömu tölur þannig að á fjölbýlishúsinu hagnaðist verktakinn 20% en á sérbýlinu tapaði hann 20%.
.
05. júlí 2005
Tilboð yfir áætlunum
Í fyrstu viku júlí voru opnuð tilboð í stækkun leikskóla sem Hannarr reiknaði fyrir einn af viðskiptavinum sínum og voru öll tilboð í verkið yfir kostnaðaráætlun eða frá 10 - 60%.
Þetta er nokkuð hefðbundið miðað við árstíma, en þó ef til vill nokkru hærra en venja er og er ástæðan vafalaust þensla sú sem er á markaðnum nú.
Fram að þessum tíma á árinu, hafa tilboð þau sem fyrirtækið þekkir til verið að meðaltali undir kostnaðaráætlunum, eins og venjulega.
.
30. nóvember 2001
Nýr vefur tekinn í notkun hjá Hannarr - www.hannarr.com
Að undanförnu hefur verið unnið að gerð nýs vefs hjá okkur er lýsir þeirri þjónustu sem fyrirtækið býður viðskiptavinum sínum. Auk upplýsinga um rekstrarráðgjöf er fyrirtækið veitir má finna á vefnum ýmsar nytsamar upplýsingar er tengjast byggingariðnaðinum, orkumálum, byggingu og rekstri smávirkjana.
Áhugaverð reiknilíkön fyrir húsbyggjendur eru á vefnum sem og reiknilíkan fyrir smærri virkjanaframkvæmdir.
Við bjóðum alla velkomna á vefsíður okkar og vonum að þær komi sem flestum að gagni.
Allar ábendingum og óskir um upplýsingar eru vel þegnar og má koma þeim á framfæri til okkar á hannarr@hannarr.com
Vefinn hannaði Arnaldur Hilmisson, vefhönnuður.
